GÜLNAR AZERİ

Həyatdan əlimi üzdüyüm an mən,

Ay kimi nur saçdın qaranlığıma.
Təklikdən bezdiyim, sezmiş kimi sən,
Son verdin qorxulu yalnızlığıma.

Səninlə dağıldı qəmim kədərim,
Ümidlə açılır hər gün səhərim.
Kaş ki, sən olasan mənim qədərim,
Bir bağban olasan həyat bağıma.

Dilimdə ən şirin sözüm söhbətim,
O qara gözlərin mənim cənnətim.
Tək sənsən sərvətim, varım dövlətim,
Sevinc gətirmisən buz yanağıma.

Sanıram səninlə, dünya mənimdir,
Sənsizkən bu dünya mənə qənimdi.
Adını səsləyən mənim dilimdir,
Xoş gəldin dünyama, sən ocağıma.
Rəhm eylə sən bizə gözəl Allahım 

Niyə aramızda söz oldu bizim 
Bəlkə eşqimizdə göz oldu bizim 
Bağrımızın başı köz oldu bizim 
Rəhm eylə sən bizə gözəl Allahım 

Xatirələr bizi yandırdı yaxdı 
Sevgimizə fələk qıyqacı baxdı 
Nə iş idi yaşımızın bu vaxtı 
Rəhm eylə sən bizə gözəl Allahım 

Əlimizdən getdi şirin sevgimiz 
Hicranın əlində can veririk biz 
Vüsal həsrətindən bitib qəlbimiz 
Rəhm eylə sən bizə gözəl Allahım 

Ağırdı bu dərdlər çəkə bilmərəm 
Başqa birisini vallah görmürəm 
Yana şam idim artıq sönürəm 
Rəhm eylə sən bizə gözəl Allahım